អាហ្សងទីន៖ កំពូលកីឡាករបាល់ទាត់ Lionel Messi បញ្ជាក់ថា លោកនឹងចូលលេងការប្រកួត World Cup ចុងក្រោយបង្អស់ ក្នុងការប្រកួតវគ្គផ្តាច់ព្រ័ត្រ World Cup ឆ្នាំ២០២២ នេះ ដែលអាហ្សង់ទីន នឹងត្រូវជួបជាមួយក្រុមមួយក្នុងចំណោមបារាំង ឬម៉ារ៉ុក ដែលនឹងជួបគ្នាដើម្បីកៅអីវគ្គផ្តាច់ព្រ័ត្រយប់នេះ។ 

Messi បានរួមចំណែកជួយអាហ្សង់ទីនទម្លាក់ក្រូអាតក្នុងលទ្ធផល ៣-០ កាលពីយប់មិញនេះ នឹងបាននាំឱ្យអាហ្សង់ទីនឡើងទៅកាន់វគ្គផ្តាច់ព្រ័ត្រសាជាថ្មី។ 

ថ្លែងប្រាប់សារព័ត៌៌មានកីឡាអាហ្សង់ទីន Diario Deportivo Ole Messi ប្រធានក្រុមអាហ្សង់ទីនរូបនេរៀបរាប់ថា៖ "ខ្ញុំពិតជារីករាយខ្លាំងដែលអាចសម្រេចបានលទ្ធផលនេះ ដោយបញ្ចប់អាជីពនៅ World Cup របស់ខ្ញុំក្នុងការប្រកួតវគ្គផ្តាច់ព្រ័ត្រ"។ Messi បន្តថា៖ "នៅសល់ពេលវេលាយូរទៀតទើបដល់ការប្រកួត World Cup បន្ទាប់ ដែលខ្ញុំគិតថាប្រហែលមិនអាចចូលរួមបានទេ។ យ៉ាងណាមិញ ការ​ប្រកួត World Cup ចុងក្រោយនៅវគ្គផ្តាច់ព្រ័ត្របែបនេះ គឺជារឿងល្អបំផុត"។

កីឡាករ Lionel Messi ក្នុងការប្រកួតទល់នឹងក្រូអាតយប់មិញនេះ គឺជាការលេងឱ្យក្រុមជម្រើសជាតិបាន ១៧២ប្រកួត និងជាការបង្ហាញខ្លួននៅ World Cup ៥លើក ពីលើកំពូលកីឡាករ Diego Maradona និង Javier Mascherano ដែលបង្ហាញខ្លួនបាន ៤ព្រឹត្តិការណ៍ World Cup។

ជ័យជម្នះយប់មិញនេះ បណ្តាលឱ្យអ្នកគាំទ្រអាហ្សង់ទីនរាប់ពាន់នាក់ចេញមកអបអរសាទរពាសពេញដងផ្លូវក្នុងប្រទេស ខណៈការឈ្នះពាន World Cup ចុងក្រោយបង្អស់របស់អាហ្សង់ទីន ធ្វើបានតាំងពីឆ្នាំ១៩៨៦ ស្របពេលការឈានឡើងដល់វគ្គផ្តាច់ព្រ័ត្រចុងក្រោយបង្អស់កើតឡើងកាលពីឆ្នាំ២០១៤ ដែលកាលណោះ អាហ្សង់ទីន ចាញ់អាល្លឺម៉ង់ ១-០៕